國王个旅行，今哺日要去哪?

我第一次意識到，即使是小小的新發現，原來也是要花費如此多的心力。

國王个旅行，今哺日要去哪?

來看看中央大學客家學院的學生/葉君毅
在我們單位暑期工讀時的心得分享吧

【文、圖∕葉君毅∕國立中央大學客家語文暨社會科學系四年級】

日頭烈烈，騎等車仔出發，係亻厓今年暑假个日常。

　　亻厓係新竹縣傳統戲曲推廣協會个文化口述歷史員，騎等車仔，愛去哪位？愛去尋祭祀三山國王个宮廟，新竹縣有十七座宮廟拜三山國王，在竹東、芎林、橫山、關西、新埔、北埔、寶山摎峨嵋，有兜廟地有幾千坪恁闊，有兜斯像伯公廟恁大，逐隻廟有逐隻廟个歷史。

　　逐擺摎同事共下出門，訪問廟公、廟主委，還有廟脣頭坐涼个老人家，同佢兜打嘴鼓个時節，做得聽著在地个故事，毋單淨當生趣乜當有意義，佢兜講出來个話，係當珍貴个第一手資料。亻厓第一擺意識著，原來細細个發現，乜愛恁煞猛正尋得著，毋過這就係田野調查當生趣个地方，因為有當大个毋確定性，你毋知今晡日會堵著麼儕？乜毋知會問著麼个？有兜廟在山崗壁壢角，亻厓兜嗄愛問路正尋得著。

　　訪問恁多擺，我學著，莫細看任何一件事情，看起來毋大个廟，乜有當精彩个故事，逐人都有自家个生活經驗，莫去預設立場，係亻厓不停學習个精神。當歡喜這一隻半月來，對新竹客莊有較多个認識，雖然講時間毋長，沒法度摎所有宮廟做完整个統整，毋過亻厓相信，學著个文化歷史絕定毋會少。

　　協會个同事分亻厓當多關心，堵著難題个時節，會分亻厓建議，乜會摎亻厓討論，毋會分亻厓忒多壓力，感覺當輕鬆，毋過乜做得摎事情做得當好。協會分實習生當大个空間，做得自由發揮你个想法，係講你對客家文化有興趣，這片係你做得投入熱情个好位所，為客莊歷史盡一份心力。